பிரபல யூடியூபர் டிடிஎஃப் வாசன் யூடியூபில் பைக்கில் சாகசம் செய்யும் வீடியோக்களை வெளியிடுவதன் மூலம் ஏராளமான ரசிகர்களை சேகரித்து வைத்துள்ளார்.
அதேசமயம் இவர் மஞ்சள் வீரன் எனும் திரைப்படத்தில் கதாநாயகனாக அறிமுகமாகிறார் என்று ஏற்கனவே தகவல்கள் வெளியானது. அதன்படி இந்த படத்தை செல்லம் என்பவர் இயக்கப் போவதாகவும் இந்த படத்தினை தி பட்ஜெட் ஃபிலிம் கம்பெனி தயாரிக்கப் போவதாகவும் அறிவிப்பு வெளியானது.
அதைத்தொடர்ந்து படப்பிடிப்புகள் நடத்தப்பட்டு வந்த நிலையில் டிடிஎஃப் வாசன் படப்பிடிப்பில் சரியாக ஒத்துழைப்பு தராத காரணத்தால் அதிரடியாக படத்தில் இருந்து நீக்கப்பட்டார். இதனை இயக்குனர் செல்லம் கடந்த சில தினங்களுக்கு முன்னர் நடந்த பேட்டி ஒன்றில் தெரிவித்திருந்தார்.
அதேசமயம் டிடிஎஃப் வாசன் படம் தொடர்பாக அனைத்து செலவுகளையும் தான் செய்ததாகவும் படத்திலிருந்து நீக்கியதற்கான காரணம் மட்டும் தனக்கு தெரிய வேண்டும் எனவும் கேள்வி எழுப்பியிருந்தார்.
இந்நிலையில் மஞ்சள் வீரன் படத்தில் நடிக்கும் புதிய ஹீரோ தொடர்பான அப்டேட்டை படக்குழு வெளியிட்டுள்ளது. அதன்படி மஞ்சள் வீரன் படத்தில் நடிகர் கூல் சுரேஷ் ஹீரோவாக நடிக்கப் போகிறார் என்று அதிகாரப்பூர்வமாக அறிவிக்கப்பட்டுள்ளது. இது தொடர்பான புகைப்படங்களும் வீடியோவும் இணையத்தில் வைரலாகி வருகின்றன.
நடிகர் கூல் சுரேஷ் ஏற்கனவே காதல் அழிவதில்லை, திருடா திருடி, பம்பரக் கண்ணாலே, நண்பேண்டா என பல படங்களில் சிறிய கதாபாத்திரங்களில் நடித்திருந்தார் என்பது குறிப்பிடத்தக்கது.
