கவின் நடிப்பில் கடைசியாக ஸ்டார் திரைப்படம் வெளியாகி ஓரளவிற்கு நல்ல வரவேற்பை பெற்றது. அதைத்தொடர்ந்து கவின் ஏகப்பட்ட படங்களில் கமிட்டாகி நடித்து வருகிறார். இதற்கிடையில் இவர், ப்ளடி பெக்கர் எனும் திரைப்படத்தில் நடித்திருக்கிறார்.
இந்த படத்தை இயக்குனர் நெல்சன் தயாரிக்க நெல்சனின் உதவி இயக்குனர் சிவபாலன் இயக்கியிருக்கிறார். ஜென் மார்ட்டின் இந்த படத்திற்கு இசையமைத்துள்ளார். இந்த படத்தில் கவினுடன் இணைந்து ரெடின் கிங்ஸ்லி, மாருதி பிரகாஷ்ராஜ், சுனில் சுகதா, பிரியதர்ஷினி ராஜ்குமார், அக்ஷயா ஹரிஹரன் உள்ளிட்ட பலரும் நடித்திருக்கின்றனர். இந்த படம் வருகின்ற அக்டோபர் 31 தீபாவளி தினத்தன்று திரைக்கு வர தயாராகி வருகிறது.
அதன்படி இந்த படத்தின் டீசர் ட்ரெய்லரும் அடுத்தடுத்து வெளியாகி படத்தின் மீதான எதிர்பார்ப்பை அதிகப்படுத்தி வருகின்றன. இந்நிலையில் இந்த படத்தின் ட்ரெய்லர் வெளியீட்டு விழா நேற்று (அக்டோபர் 18) சென்னையில் நடைபெற்றது. அப்போது மேடையில் பேசிய நெல்சன், இயக்குனர் சிவபாலனிடம் இந்த படத்திற்கு கவின் வேண்டாம் என்று சொல்லியதாக கூறியுள்ளார். அதாவது, “இருவருக்குமே கவின் நண்பனாக இருந்தாலும் அவனை தனிப்பட்ட முறையில் பார்த்துக் கொள்ளலாம். ஒரே வண்டியில் ட்ரிப்பிள்ஸ் போற மாதிரி கொலாப்ஸ் பண்ணிட வேண்டாம். கவின் வேண்டவே வேண்டாம் என்று சிவபாலனிடம் சொன்னேன்.ஏனென்றால் பெக்கர் கதாபாத்திரம் கவினுக்கு செட்டாகுமா? இந்த கதை செட்டாகுமா? என யோசித்தேன்.
ஆனால் சிவபாலன், கவின் தான் சரியான சாய்ஸ் என்று சொன்னார். அதன் பிறகு படத்தை எடுத்த பிறகு முழு படத்தையும் பார்த்தோம். அதில் நடிகர் கவின் சிறப்பாக நடித்திருந்தார். அதன் பிறகு தான் கவின் நடிக்க வேண்டாம் என்று சொன்னது தவறு என்பதை புரிந்து கொண்டேன்” என்று தெரிவித்துள்ளார்.
மேலும் “சிவகார்த்திகேயனின் அமரன், ஜெயம் ரவியின் பிரதர் போன்ற நண்பர்களின் படங்கள் ஒரே நாளில் வெளியாவது மகிழ்ச்சியாக இருக்கிறது” என்று பேசியுள்ளார் நெல்சன். அடுத்தது, “ஜெயிலர் படம் மாபெரும் வெற்றி பெற்றதால் தான் நான் ப்ளடி பெக்கர் படத்தை தயாரித்துள்ளேன். ஜெயிலர் படம் சராசரியான வெற்றியைப் பெற்றிருந்தால் என்னால் இந்த படத்தை தயாரித்திருக்க முடியாது” என்றும் கூறியுள்ளார்.
