‘புதிய இந்தியா’வில் மோடி டிஜிட்டல் வழிப்பறி- மு.க.ஸ்டாலின் விமர்சனம்
‘புதிய இந்தியா’வில் பிரதமர் நரேந்திர மோடி டிஜிட்டல் வழிப்பறி செய்வதாக முதலமைச்சர் மு.க.ஸ்டாலின் விமர்சனம் செய்துள்ளார்.
பாஜக ஆட்சிக்கு வந்தால் கருப்பு பணத்தை மீட்டு மக்கள் ஒவ்வொருவரின் வங்கிக் கணக்கில் ரூ . 15 லட்சம் போடுவதாக ஆசையை தூண்டி ஆட்சிக்கு வந்தவர்கள் செய்தது என்ன? மக்கள் சிறுகச் சிறுகச் சேர்த்த பணத்தையும் செல்லாததாக்கி, வங்கிகளில் வரிசையில் நிற்க வைத்து வதைத்தார்கள்.
சுருக்குப் பையில் இருக்கும் பணத்தையும் பறித்துக் கொள்ளும் ஆட்சியாக பாஜக ஆட்சி இருக்கிறது என்று கூறிய முதலமைச்சர், வங்கியில் மினிமம் பேலன்ஸ் இல்லை என அபராதம் விதித்தே ரூ.21 ஆயிரம் கோடிக்கு மேல் ஏழைகளிடம் மோசடி செய்தார்கள் என்றார்.
ஏழை வங்கி கணக்குகளில் இருந்து பணத்தை உருவுவதுதான் ஏழைகளுக்கான அரசா?
கார்ப்பரேட்களுக்குப் பல லட்சம் கோடி கடன் தள்ளுபடி, கார்ப்பரேட் வரியை 30 விழுக்காட்டில் இருந்து 22 விழுக்காடாக குறைத்து, ஆண்டுதோறும் லட்சக்கணக்கான கோடிகளை வரிச்சலுகையாக அள்ளித் தந்துவிட்டு, அதை ஈடுகட்ட, மனதில் ஈரமே இல்லாமல், அல்லற்படும் ஏழை மக்களிடம் அரசே இப்படி டிஜிட்டல் வழிப்பறி செய்வதை அனுமதிக்கலாமா?
இது பணக்காரர்கள், கோடீஸ்வரர்களுக்கான அரசு அல்ல; ஏழைகளுக்கான அரசு எனக் கூசாமல் புளுகுகிறார் பிரதமர் மோடி, இதுவா ஏழைகளின் நலன் காக்கும் அரசு? என்று முதலமைச்சர் மு.க.ஸ்டாலின் விமர்சனம் செய்துள்ளார்.
