பஞ்சாப் அணிக்கு எதிரான போட்டியில் சென்னை அணி 28 ரன்கள் வித்தியாசத்தில் அபார வெற்றி பெற்றது.
17வது ஐபிஎல் கிரிக்கெட் தொடர் கடந்த மார்ச் மாதம் 22ம் தேதி தொடங்கியது. இதுவரை 52 லீக் போட்டிகள் நடந்துள்ளன. இன்று 53வது லீக் போட்டி நடைபெற்றது. இமாசலபிரதேசத்தில் உள்ள கிரிக்கெட் மைதானத்தில் மாலை 3.30 மணிக்கு நடைபெற்ற 53வது லீக் போட்டியில் சாம் கரண் தலைமையிலான பஞ்சாப் கிங்ஸ் அணியும் ருத்ராஜ் கெய்க்வாட் தலைமையிலான சென்னை சூப்பர் கிங்ஸ் அணிகளும் பலப்பரீட்சை நடத்தின.
இப்போட்டியில் டாஸ் வென்ற பஞ்சாப் அணியின் கேப்டன் சாம் கரண் முதலில் பந்துவீச்சை தேர்வு செய்தார். இதனைத்தொடர்ந்து சென்னை அணி முதலாவது பேட்டிங் விளையாடியது. தொடக்க ஆட்டக்க்காரகளாக அஜிங்கியா ரஹானே 9 ரன்களிலும் ருத்ராஜ் கெய்க்வாட் 32 ரன்களிலும் ஆட்டமிழந்தனர். அடுத்து களமிறங்கிய டேரில் மிட்செல் 30 ரன்களிலும் சிவம் துபே ரன்கள் ஏதுமின்றியும் ஆட்டமிழந்தனர். கடைசியில் அதிரடி காட்டிய ரவீந்திர ஜடேஜா 26 பந்துகளில் 43 ரன்கள் எடுத்து ஆட்டமிழந்தார். இறுதியில் அணியானது 20 ஓவர்கள் முடிவில் 9 விக்கெட்டுகள் இழந்து 167 ரன்கள் எடுத்தது.
பின்னர் 168 ரன்கள் எடுத்தால் வெற்றி என்ற இலக்குடன் பஞ்சாப் அணி இரண்டாவது பேட்டிங் விளையாடியது. தொடக்க ஆட்டக்காரர்களாக களமிறங்கிய பிரப்சிம்ரன் சிங் 30 ரன்களிலும் ஜானி பேர்ஸ்டோ 7 ரன்களிலும் ஆட்டமிழந்தனர். அடுத்து களமிறங்கிய ரில்லி ருசோ ரன் ஏதுமின்றியும் சசாங் சிங் 27 ரன்களிலும் ஆட்டமிழந்தனர். மற்ற வீரர்கள் சொற்ப ரன்னில் ஆட்டமிழந்தனர். இறுதியில் அணியானது 20 ஓவர்கள் முடிவில் அனைத்து விக்கெட்டுகளையும் இழந்து 139 ரன்களுக்கு ஆல் அவுட் ஆனது. பின்னர் 28 ரன்கள் வித்தியாசத்தில் சென்னை அணி அபார வெற்றி பெற்றது. சென்னை அணியின் ஆட்டநாயகனாக 3 விக்கெட்டுகளை கைப்பற்றிய ரவீந்திர ஜடேஜா தேர்வு செய்யப்பட்டார்.
