சரிவில் இருந்து மீளுமா லக்னோ அணி? – ஐதராபாத் அணியுடன் இன்று பலப்பரீட்சை!

17வது ஐபிஎல் கிரிக்கெட் சீசனில் இன்று நடைபெறும் 57வது லீக் போட்டியில் ஐதராபாத்vsலக்னோ அணிகள் பலப்பரீட்சை நடத்துகின்றன.

17வது ஐபிஎல் கிரிக்கெட் தொடர் கடந்த மார்ச் மாதம் 22ம் தேதி தொடங்கியது. இதுவரை 56 லீக் போட்டிகள் நடந்துள்ளன. இன்று 57வது லீக் போட்டி நடைபெறுகிறது. ஐதராபாத்தில் உள்ள ராஜீவ் காந்தி சர்வதேச மைதானத்தில் இன்று இரவு 7.30 மணிக்கு நடைபெறும் 57வது லீக் போட்டியில் பேட் கம்மின்ஸ் தலைமையிலான சன் ரைசர்ஸ் ஐதராபாத் அணியும் கேஎல் ராகுல் தலைமையிலான லக்னோ சூப்பர் ஜெயண்ட்ஸ் அணிகளும் பலப்பரீட்சை நடத்துகின்றன. ஐதராபாத் அணியை பொறுத்தவரை இதுவரை விளையாடியுள்ள 11 போட்டிகளில் 6 வெற்றி 5 தோல்வியுடன் புள்ளிப்பட்டியலில் 4வது இடத்திலுள்ளது. லக்னோ அணியை பொறுத்தவரை இதுவரை விளையாடியுள்ள 11 போட்டிகளில் 6 வெற்றி 5 தோல்விகளுடன் புள்ளிப்பட்டியலில் 6வது இடத்திலுள்ளது.

இவ்விரு அணிகளும் இதுவரை 3 போட்டிகளில் நேருக்கு நேர் மோதியுள்ளன. இதில் லக்னோ அணி 3 போட்டிகளிலும் வெற்றி பெற்று ஆதிக்கம் செலுத்தியுள்ளது. கடந்த போட்டியில் கொல்கத்தா அணிக்கு எதிராக 98 ரன்கள் வித்தியாசத்தில் படுதோல்வி அடைந்த லக்னோ அணி சரிவில் இருந்து மீளுமா என ரசிகர்கள் மத்தியில் ஆவலுடன் எதிர்பார்க்கப்படுகிறது. அதே சமயம் மும்பை அணிக்கு எதிரான போட்டியில் தோல்வியடைந்த ஐதராபாத் அணி இப்போட்டியில் வெற்றி பெற முயற்சிக்கும் என்பதால் இப்போட்டியில் விறுவிறுப்புக்கு பஞ்சம் இருக்காது.